ಪಲಾಯನ /ಮೌನ ಕಣಿವೆ. 

ದೂರದ ಬೆಟ್ಟ ನುಣ್ಣಗೆ, ಕಾಣುವ ಕಾಡು ಸಣ್ಣಗೆ
ಹೂಕೋಸುಗಳ ಹಸಿರ ಸೊಂಪಿನ ಗುಂಪು
ಹೊರಳಿದ ಕೋನದಲ್ಲೆಲ್ಲಾ ವಿಸ್ತರಿಸುವ ಕಣ್ಣು
ಒರಟು ಹಸಿರ ಚಾದರಹೊದ್ದಿರುವ ಗಿರಿಗಳ ರಾಶಿ,
ಕಣಿವೆಯ ಆಳದ ಮೇಲೆ ಕಾಣುವ ವಿಸ್ತಾರ ನೀಲಿ, 
ಕಾಡ ತಬ್ಬಲು ಕಾಡುವ ಚಡಪಡಿಸುವ ಮನಸು
ಶಿಖರ ಏರಿ ನಿಂತಾಗ ಸ್ವರ್ಗತಾಕಿದ ಅವ್ಯಕ್ತ ಖುಷಿ,
ನೂರಾರು ಬೆಟ್ಟಗಳು ವಿಶಿಷ್ಟ ಮೇಲ್ಮೈ
ಗುಮ್ಮಟವೋ, ಗೋಪುರವೋ,ಎಲ್ಲವೂ ಅಂತ್ಯದಲಿ
ವಕ್ರತೆಯ ಸಮತಟ್ಟು,ಇಳಿಜಾರ ಮೇಲ್ಮುಖ ಏರು ದಿಣ್ಣೆ
ತಗ್ಗಾಗುವ ಬಯಲು, ಕೆಳಹರಿಯುವ ಝರಿ
ರಕ್ತನಾಳಗಳು, ಲೋಮನಾಳಗಳ ಹರಿವಲ್ಲಿ ತೊರೆಗಳ ಕವಲು
ಕತ್ತರಿಸಿ,ನೀಟಾಗಿ ಬೋಳಿಸಿದ ಉದ್ಯಾನವನದ ಹುಲ್ಲಲ್ಲ
ಸ್ವೇಚ್ಛೆಯಲಿ ಎಲ್ಲೆಡೆ ಹರಡಿ, ಎಲ್ಲರನು ಬಚ್ಚಿಡುವ
ಸಸ್ಯಾಹಾರಿ ಹಲ್ಲುಗಳ ಸೈಂಧವ ಹುಲ್ಲು
ಅಪರಿಚಿತ ಜೀವಿಗಳ ಬಾಡಿಗೆರಹಿತ ಆವಾಸ
ಇಳಿಜಾರಿನ ತಳದಲ್ಲಿ, ಅಸಂಖ್ಯ ಅಗೋಚರ ಜೀವ ಪ್ರಭೇದಗಳು
ಇಳಿದಾಗ, ನಡೆದಾಗ, ಏರುವಾಗ ಎಲ್ಲವೂ ಅಯೋಮಯ!
ದೇಹಾಂತರಿಕ ಅಂಗರಚನಾ ಬಲೆ,
ವಿವರಣೆಗೆ ಸಿಕ್ಕದ, ವಿವಿದತೆಯನ್ನೇ ಕೆಣಕಿ,
ಜೋಡಿಸಲ್ಪಟ್ಟ ಸಸ್ಯ ಸ್ತರಗಳ ಜಾಲ,
ಅಂಗ, ಅಂಗಾಂಶಗಳ ಪ್ರತ್ಯೇಕ ಕೋಶಗಳ ವಿನ್ಯಾಸ, ,
ಮರಗಿಡಗಳು, ಪೊದೆ ಮೂಲಿಕೆ, ಎಲೆ ಹೂಗಳ ಓಕುಳಿ
ಒಣಗಿ, ಒಂಟಿನಿಂತ ಕಪ್ಪು ನಿರ್ಜೀವ ಪಂಜರ
ಭಯ ಹುಟ್ಟಿಸುವ ಒಂಟಿ ಮರ ಹಸಿರ ಓಯಸಿಸ್ ನಲ್ಲಿ
ಇಂಚು,ಇಂಚಲ್ಲೂ ಬದಲಾಗುವ ಬಣ್ಣದ ಸಂಚು,
ಮರುಗಳಿಗೆಯಲಿ ದಟ್ಟಮೋಡದಲಿ ಮಿಂಚು
ಯಾವುದಕೋ ನಡೆಯುತಿದೆ ಈ ಹೊಂಚು,
ಏನಿದು ಹಸುರಿನ ಈ ಸೋಗು? ಕಾಡಿನ ಸೊಬಗು,
ಇರುಳು ಬೆಳಕಿನ ಮೆರಗು! ಶಾಶ್ವತ ಬೆರಗು,
ಮರೀಚಿಕೆಯ ವಿಸ್ತಾರ, ಆಲಂಗಿಸಿ ಮುದ್ದಿಸುವ ಆಸೆ
ಏನನ್ನು ಅಪ್ಪಲಾರದ, ಎಲ್ಲವನು ಹಿಡಿಯಲಾಗದ
ವಿಶಾಲತೆಯಲಿ ಕರಗಿ, ಆತ್ಮ ಆಂತರ್ಯದಲಿ
ಕಳೆದು ಹೋಗುವ ಅಸಹಾಯಕ ಪ್ರೇಮಿ.

Comments

Popular posts from this blog

ಕಾಗೆ....