Reunited...at last..

ಕನವರಿಕೆ.

ಮಾತೆಯ ಮಮತೆಯ
ಕುಡಿಯಾದರೂ...ಹುಟ್ಟಿದ್ದು ಊರಲ್ಲ,
ಊದು ಕುಲುಮೆಯ ಗರ್ಭದಲ್ಲಿ, 
ಜ್ವಾಲೆಯಲೇ ಕಳೆದ ಬಾಲ್ಯ ಕಾಡುಬಂಡೆಗಳಮೇಲೆ
ಇವ ನಿಜಕೂ ಅಗ್ನಿಪುತ್ರನಲ್ಲ,
ಜೂಟಾಟ, ಕಣ್ಣುಮುಚ್ಚಾಲೆ ಕೊರಕಲು ಪ್ರಪಾತಗಳಲ್ಲಿ
ತಳರಹಿತ ಗವಿಯ ಸಂದು, ಗೊಂದುಗಳ ನೆರಳಲ್ಲೂತೀವ್ರ ತಾಪ.

ಬಯಲ ದರ್ಶಿನಿಯ ನೇರಲೆ,
ಕಾರೆ,ಕವಳೆ,ಲೇಬೆ, ಬೋರೆ, ಉಪಹಾರಕ್ಕೆ,
ಶಿಲಾ ಶಿಖರ ದರ್ಶಿನಿ ಚಾರಣದ ಕ್ಯಾಂಟೀನಲ್ಲಿ ಸಿತಾಫಲ
ಅನ್ ಲಿಮಿಟೆಡ್

ಬಹಿರ್ದೆಸೆಯ ದಿನಚರಿಯಲಿ ನುರಿತ ಪರ್ವತಾರೋಹಿ
ನಿರ್ಜನ ಕಣಿವೆಯಲಿ ಸ್ವಗತ, ಶಾಶ್ವತ
ಸಂಭಾಷಣೆ ಕೂಗೋಗುಡ್ಡದ ಪ್ರತಿಧ್ವನಿಯ ಕಂಪನ
ರಾಕ್ಷಸ ಇಳಿಜಾರು ಬಂಡೆ ಬೈಗಳ ಪ್ರತಿಧ್ವನಿಯ ರೋಮಾಂಚನ
ನೇಯ್ಗೆ ಮಗ್ಗಗಳ ನಿಲ್ಲದ ನಡಿಗೆಯ ರೇಶಿಮೆಯ ಹೆಜ್ಜೆ

ಶಿಸ್ತಿನ ಸಾರೋಟು ಚಲನೆಯಲಿ ಲಾಳಗಳ ಓಟ
ನಿರಂತರ ಧ್ವನಿಸುವ ಚಟಾ ಪಟಾ
ಊರಿಗೊಂದು ಭಾಷೆ ಅದರ ಸಾಮಾನ್ಯದ ಅಸ್ತಿತ್ವ
ಕರಡಿ ಗಂಗಣ್ಣನ ಘಮ,ಘಮ ಮಂಡಾಳ್ ಒಗ್ಗರಣಿ ಆದ್ಯಾತ್ಮ ತತ್ವ
ಅತ್ತಿಕಾಯಿ, ಜೊತೆಗೆ ಮೆಣ್ಸಿನ್ಕಾಯ್ ಉಳ್ಳಾಗಡ್ಡಿ

ಈಜಾಟ ಮನೋರಂಜನೆ ಆಟ, ನೀರಿದ್ದ ಆ ದೊಡ್ಡಬಾವಿ
ಬಾನಿ ಎಳೆಯುವ ಹಗ್ಗದ ಮೇಲೆ ಜೋಕಾಲಿ
ಶುಶ್ಕತೆಗೆ ಬಡಕಲಾಗಿ ಒಣಕಲಾಗಿ ನಿಂತ ಸೈಂಧವ ತಾಳೆಮರ
ಈಚಲಿನ ವಿರಳದಲಿ ತೆಂಗು, ಆದರೂ ಹೆಸರು ಬಾಳೆತೋಪು
ಮೇಕೆ,ದನಗಳ ಜಾಡೇ ಜಾರೋಬಂಡಿ
ಹಟ್ಟಿಯಲಿ ಕತ್ತರಿಸಿ ಹಸಿರು ಜೋಳದ ಸಪ್ಪೆ.

ಹಳಸಿದ ಹಿಂಡಿಗೆ ಆಕಳುಗಳು ಜೊಲ್ಲುಸುರಿಸುತಿತ್ತು
ನಿಜವಾದ ಮಳೆ ನಿಜಕ್ಕೂ ಸುರಿಯುತ್ತಿತ್ತು
ಹಳ್ಳ ಹರಿಯುತ್ತಿತ್ತು, ಚಪ್ಪರ ಸೋರುತಿತ್ತು
ಕಾಫಿಯ ಪ್ರವಾಹದಲಿ ಕಾಗದದೋಣಿಗಳು
ಸರಾಗ ತೇಲಿ, ಉತ್ಸಾಹದಲಿ ಮುಳುಗಿ ಊರ ಕೆರೆ
ಸೇರಿ, ಕುರಿಗಳ ಪಿಚಿಕೆಯ ಜೊತೆ
ಪಳೆಯುಳಿಕೆಯಾಗಿತ್ತು.

ಅಜ್ಜಿ ಹೇಳುವ ಕಥೆ, ಲಾಟೀನು ಬೆಳಕಲ್ಲಿ
ಮುತ್ತುಗದ ಎಲೆ ಪೋಣಿಸುವ ಹುರಿಯಲ್ಲಿ
ಡಬ್ಬಣಕೆ ಚುಚ್ಚಿ ಸರ ಮಾಡುವ ಮೊಮ್ಮಕ್ಕಳ ಸರಪಣಿ
ಬೋಳುತಲೆಗೆ ಸೆರಗು ಹೊದ್ದ ಅಜ್ಜಿಯಸುತ್ತ
ನಿದ್ರೆ, ಒಬ್ಬಬ್ಬರನ್ನೇ ಆಹುತಿ ತೆಗೆದುಕೊಂಡಾಗ
ಜಗವೆಲ್ಲ ಕನಸಲ್ಲಿ ಜಾರುತ್ತಿತ್ತು.